توسيع الطرق في بني سويف

شاهد بالصور الاهتمام بتوسيع الطرق بمحافظه بني سويف

منذ حوالي 8 أشهر بدأ مشروع توسيع الطرق العامة ببني سويف

فتم في البداية تقطيع الأشجار على جانبي الطريق، ثم تكسير الارصفة حتى وصلت لبداية المنازل والمحلات.

واستمر العمل في مختلف احياء بني سويف من الجزيرة المرتفعة وش صلاح سالم وش عبد السلام عارف وغيره


وانتقل الأمر إلى المراكز التابعة لبني سويف

اثناء زيارة للأهل في مركز سمسطا من حوالي أربع شهور توسيع الشوارع بدأ ولكن ما استرعى انتباهي شارع رئيسي به اسمه شارع بورسعيد تم في البداية اتخاذ اجراءات التوسيع المتعارف عليها من قطع الاشجار وهدم الارصفة حتى بداية المنازل والمحلات

لكن الجديد هنا انه سيتم تقسيم الشارع إلى إتجاهين بفاصل اسمنتي ... والغريب هنا ان الشارع لا يحتمل ان يكون باتجاهين خاصة لكونه شارع رئيسي

ولاحظوا معي ذلك في الصور

هذه صورة للشارع .. وشاهدوا كم يبلغ عرضه

وهذه صور للتقسيمات التي بدأت في بداية الشارع

سياده النائب المحترم

قبه المجلس

جلسه من مجلس الشعب

الى الساده النواب السابقين لحظه من فضلكم

ها هى الايام قد ولت منذ ان قمتم بالترشيح الفتره السابقه لمجلس الشعب
ها هى الايام قد ولت منذ ان اغرقتمونا بالوعود
وهيهات ان توفوا بها
فبالله عليكم هل تتذكرون ما وعدتم به ؟
وان كان منكم من يتذكر هل اوفى بما وعد به ؟
فانا اسالكم لماذا كنتم تترشحون بالنيابه عننا ؟
فوالله قد وجدنا انك لم تترشحون نواب عننا " نحن الشعب"
ولكنكم انقسمتو وكنتم نواب اما عن الاخوان او عن الحزب الوطنى
هل الاخوان هم من انتخبوكم ام نحن ؟
هل الحزب الوطنى هو من اعطاكم صوته ام الشعب ؟
هل تتذكرون ما هو المجلس الذى تترشحون اليه ؟
هل هو مجلس الشعب ام مجلس الوطنى ؟

الى الساده النواب القادمين اهلا بكم

قد يكون منكم من هو من السابقين وقد يكون مكنكم من هو جديد
ولكن لماذا نراكم تتهافتون على ان تكونو مرشحى الحزب الوطنى
لماذا تنتسبون اليه كلكم مع انه سيكون له مرشح واحد فقط على كل مقعد
اهو عدم ثقه فى انفسكم انك لن تنجحو كمستقلين
ام لثقه عندكم ان الانتخابات ستكون لصالح مرشح الوطنى مهما كان
لا والله لن ننتخب الا من كان لديه المقدره ان يكون نائب عنا يخدمننا
فانا اعلم تمام العلم ان من لم يختاره الحزب الوطنى سياتى غدا
ويقول " فضلت ان اكون مستقلا حتى اخدمكم "
ولكننا نقولها لكم
كونو نواب عن الشعب لا عن الحزب او الاخوان
الشعب الذى يختار لا الحزب
ونصيحه من الشعب لا نريد شعارات ولكن نريد وعودا حقيقيه
واتقوا الله فينا لانكم ستسالون عننا يوم القيامه
والايام القدمه ستثيت من يستحق ومن هو ذا وعودا زائفه .

بني سويف بتتقفل

هل هي دعوة للثورة

ام هو اختبار لجبن الشعب .. وقياس رد الفعل

ام هي دعوة لاعلان العصيان المدني

بجد الواحد مش عارف ايه اللى بيحصل بالظبط في البلد دي

إذ فجأة كده اللجان الخاصة بالتموين والمرافق والتراخيص اللى في القاهرة... ربنا كرمها وفاقت من الغيبوبة ، وبدأت تشوف شغلها

وكله بشغل الربطية والبلطجة وكله مع بعضه

لجان بتلف في بني سويف على كل المحلات اللى فيها بتراجع التراخيص ووسائل الامان فيها طفايات الحريق وشهادة معرفة استخدامها

ومحلات الفراخ ... إعادة فتح القضية من جديد حتى لو كان صاحبها ماشي مية مية

يعني من الاخر مفيش محل هيدخلوه غير لما يطلعوا عليه حاجة

قصص على الهامش

صاحب محل فراخ يقول يا باشا دي فراخ مثلجة من الجمعية شاريها ... يرد عليه ويقول بص من الآخر انا بقولهالك ... غير نشاطك احسنلك

بلطجي ربنا فتح عليه وقرر العمل الشريف ... وفتح محل شرائط ... جاءت اللجنة وكسرت له الترابيزات المرصوص عليها الشرائط

واكيد هتلاقي قصص كتير على هامش هذه الاحداث

اكيد الواحد ميكرهش ان الناس تكون ماشية صح وفي السليم

انما اكيد مش بطريقة البلطجة اللى بيعملوها دي

ربنا يكون في عون اي شخص عايز يمشي عدل في البلد دي ... خلاص راحت عليه

احسنلنا بقى نشتغل في السلاح والمخدرات وبيع الاعضاء

ولا اقولكم احسن ... احنا نشتغل بلطجية ونلم اتاوات .. اهوه نرحمهم من اللى بيحصل ده ونحميهم بدل ما هما دلوقتي مش لاقيين اللى يحميهم ولا يحسسهم بالأمان في البلد دي

واللى ليه ظهر يا باشا ايه .......

شاطرين

بنى سويف زحمه

بنى سويف زحمه.......

حد يصدق؟؟؟
لحد دلوقتى مش قادره اصدق ان بنى سويف اللى كنا بنضرب بيها المثل فى الهدوء وهدوء شوارعها
تبقى زحمه بالمنظر اللى شوفته النهارده

كنت فى طريقى اليوم عشان اخلص بعض الاوراق من احد المصالح الحكوميه
واول ما وصل السريفيس لميدان المديرية وكان المنظر؟؟
العربيات مرصوصه رصه ورا بعضها

حتى لو غيرت رايك ومش هتعدى المزلقان
مفيش اى فرصه للدخول فى اى شارع اخر

قلت فى نفسى اكيد د القطر ....عادى 10دقائق وهيتفتح الطريق

لكن للاسف الموقف كان بيتأزم والقطرممشيش
والشوارع الجانبيه كمان اتسدت عربيات ...

والكلاكسات اشتغلت وكأن كل سواق بيعزف على اله موسيقيه

واضح ان السواقين من كتر سماعهم للكلاكسات اخدو مناعه
الدور والباقى علينا ........

بنى سويف عمرها ما كانت كده ايه اللى حصل ؟؟؟
الناس زادت يعنى !!!...

الناس اللى بتركب عربيات واللى بقى عندها عربيات زادو؟؟!!

وايه يعنى!! .........كل ده ما يعملش الزحمه دى

المشكله ظهرت من بعد فتح المحافظ باب فرصه شراء تاكس والعمل عليه

شىء جميل بيفتح باب لفرصة عمل جديده

بس اللى حصل كل اللى حابب يعمل مشروع اشترى تاكس واشتغل عليه
والتاكسات زادت جدا

وتلاقى وانت واقف فى الشارع ميت تاكس بيهدو ويبصولك يمكن تشاور عقلك وتركب
ولو رفعت اديك تمسح وجهك بمنديل ساعتها ممكن تلاقى التاكس وقف وفتحلك الباب
مش انت اللى شاورت ..!!!!!

ونتيجه لكده اصبحت شوارع بنى سويف الصغيره زحمه
وعشان توصل لمكان كان بياخد زمان عشر دقائق دلوقتى ممكن ياخد تلت او نصف ساعه بتاكس

وبعد ما عدى القطر ووصلنا لشارع صلاح سالم (احد الشوارع الرئيسيه فى بنى سويف)
كنت فاكره ان المشكله عند الميدان فقط واتضح ان الزحمه بقت سمه عامه خلاص
والحمد لله وصلت بعد ساعه للمصلحه المقصوده من الصباح
وطبعا كاعادت مصالحنا الحكوميه ..مصلحتى مخلصيتش

وفووووووووت علينا بكره يا سيد

بعض من معاناة طلبة كلية تربية

المكان : كلية التربية

الزمان : امتحانات نصف العام

الفصل : شتاء بارد او صح لو قلنا صقيع

طلبة كلية التربية من أكثر الاعداد نظرا لتعدد أقسامها فيمكن اعتبارها ثلاث كليات فى كلية واحدة

طفولة ـ أساسى ـ عام

وأخر قسمين يحوى كل منهم أقسام بداخله من انجليزى وجغرافيا وفيزياء وغيرها

احدثكم اليوم عن جزء من معاناة طلبة هذه الكلية والتى تبرز فى هذا الوقت .. وقت الامتحانات

فنظرا للاعداد الكبيرة للطلبة .. وعدم وجود امكانية امتحانهم فى مدرجات

فيتم عمل خيم فى الساحة الضيقة ـ بالنسبة لعددهم ـ الخاصة بالكلية

وعندما سألنا بعض الطلبة عن الخيم وكيف يجدونها

فبدأ الكل فى الشكوى فمنهم من قال ان المشكلة التى تقابلهم .. هو الكتابة خاصة فى هذا جو الصقيع هذا

حيث تتجمد أيديهم من البرد مما تكون عامل معجز للاجابة فى الامتحانات

كما قال بعضهم نظرا لطول المساحة المخصصة للامتحانات بالطول

فإن المراقبين على كل لجنة يسلون انفسهم بان يرون على موبايلات بعضهم البعض

مما يجعلهم عامل مشتت على الطلبة وعلى تركيزهم

كما تكلم الطلبة عن تعرضهم بسهولة للضوضاء التى تحدث فى الشارع حيث ان الخيم بجوار سور الكلية

مما يجعلهم كأنهم فى الشارع

وكذلك بعضهم معرض للتشتت لسهولة تمكن من يمشى فى الخارج من رؤيتهم والتعليق عليهم

كل هذه العوامل تعمل حاجز وعائق امام الطلبة فى اداء امتحانهم

وفى أواخر ايام الامتحانات امطرت السماء .. تخيلوا كيف كان الوضع فى هذه الخيم

وقد قالت احدى الطالبات انه لم يكتب امام كل خيمة اللجان الموجودة بها وارقام الجلوس

مما جعلها تدخل الامتحان اول يوم متأخر نص ساعة لتأخرها فى ايجاد لجنتها ومكان جلوسها

وهناك من ذكر ان هذا النظام موجود منذ ايام والديه .. حيث كانت كلية التربية كلية التجارة سابقا وقبلها كانت مدرسة

وعندما سألناهم اين الحل

فهناك من اوصى ببناء مبنى جديد للكلية يكون به مدرجات اكبر لاحتواء هذه الاعاداد الكبيرة

وهناك من اقترح عمل لجان امتحانات فى كافة قاعات الكلتين الخاصتين بالتربية .. على الرغم من صعوبة ذلك لبعد الكلتين عن بعض الى حد ما

وفى النهاية اترككم مع الصور التى صورتها احدى الطالبات

العيد فرحه....وااااء

كل اضحى وكل سويفي بالف خير

العيد ده قالولنا ان حديقة النيل جابوا فيها كام لعبه كده وبقت حاجه شبه الملاهى

قلنا يا مسهل.....بنى سويف بدات تشم نفسها شويه اهو ...وقررنا نروح نستكشف

ورحنا واللى حصل حصل .... طبعا تذكرة دخول الحديقه غير تذكرة دخول المدينه .....

المهم.....دخلنا ولقينا فيها لعب مكانتش موجوده فعلا قبل كده......العربيات..ولعبة الفنجان والساقيه ولعبه تانى بتدور والسلاسل ولعب للاطفال

حلو وجميل والله....كخطوه اولى طبعا .....الناس مبدأتش بالاعصار والصاروخ وقطر الموت وقطر الظلام وبيت الرعبـــ ........ايه ده لحظه لحظه...... ايه الاسماء اللى انا بقولها دى؟!؟

ماعلينا......

كنا بنقول انها كخطوه اولى تعتبر شيء كويس......بس اللى كان فعلا مش كويس خالص مستوى النظافه هناك....

قبل ما حد فيكو يتنرفز اسمعوا الكلام لحـــد الاخر

عارفه ان دا عيد بقى وكل سنه وانتو طيبين والناس فرحانه وكل حاجه......بس ليه بنبقى مستمتعين واحنا بنبهدل الاماكن اللى متخصناش .....دى الحاجه الوحيده اللى نفسي اعرفها بصراحه

المكان هناك كان على قده مش كبير اوى ..... كان فيه واحد مخصصله مكان في وسط الحديقه للحواوشي وآله ......وواحد تانى في آخرها للحلويات والفشار والكلام دا كله......والاطفال طبعا لسه واخدين العيديه وعايزين ينبسطوا.........ويرموا الاكياس هنا وباقى الاكل هنا لحد ما ملامح الحديقه بدات تختفي من كتر اللى راميينه فيها

اللى مالقيت سله واحده الناس ترمى فيها حاجتها....ولا لوحه مكتوب عليها حافظ على المكان ولا عاملين تلاته متابعين الوضع جوه وبينضفوا اول باول...دا المكان مفيهوش يا جماعه ...لو اتنين دخلو كل خمس ساعات ظبطوا الدنيا هتبقى ورد ومش هتكلفهم نص ساعه .......!

......

.ماعلينا ....طبعا مكملناش عشر دقايق جوه واكيد مفكرناش نركب حاجه وقلنا خلاص نطلع للجنينه نفسها ...... وطلعنا لقينا مقاعد جميله عند الشجر ومفيش حد عندها ...... رحنا لقيناهم حاطين عليها سائل اسود لزج اعتقد انه زفت ! ......قلنا ماهو يااما عشان هيدهنوها ولازم نحسن الظن بالناس.....يااما عشان ندخل الكافيتيريا باحترامنا ونطلب حاجه لان مفيش مكان تانى يتقعد فيه ....محدش يقولى ع النجيله....كانوا مغرقينها ميه متقلقوش ....(:

ودخلنا وقضينا اليوم ومشينا حالنا

.....

بس سؤال تانى نفسي اعرف اجابته........هو احنا عندنا ليه مينفعش يظبطوا حاجه الا ولازم يخربوا ادامها مية حاجه تانيه؟

انا فاكره ان الحديقه دى كانت من اجمل الحدائق في بني سويف.....والواحد له فيها ذكريات متتنسيش.....

طالما فكروا يطوروها ويجيبوا فيها العاب ويكلفوها.....لازم برضه يهتموا بانها تكون على مستوى مقبول من النظافه .....

"مجرد وجود سلات قمامه ولوح توعيه ممكن تتظبط الدنيا "شويه

والواجب علينا احنا كافراد اننا ناخد بالنا من تصرفاتنا وحدنا ع الاقل وبلاش ثقافة " ياعم هى بتاعتنا"

ويللا عقبال مانلاقي عندنا الصاروخ والاعصار بس بلاش قطر الموت عشان عندنا منه كتير......ويارب نشوف بنى سويف اجمل محافظه

وكل عام وانتم بالف خير